HKCC TI 翻譯 Non JUPAS 指南
最近更新 15/8/2020
成績平均積點
現實殘酷，首先都係要講下 GPA：
<2.8：基本無望，可考慮重讀、速大或社大；
2.8-3.0：希望好微，但絕非零；
3.0-3.3：會收到面試，但要等 N 手飯，有啲甚至要等到八、九月；
3.3-3.5：中下游，面試表現麻麻嘅都係要等 N 手飯；
3.5-3.6：中上游，面試穩穩陣陣會有大學收；
3.6-3.8：學霸，可以博下中大港大；
≥3.8：學神，請直接報中大港大。
收唔收到面試主要睇 sem 3 cGPA，每間大學派面試嘅標準不一，例如浸大講明 cGPA 3.2 以上、符合學科要求先會面試，所以要睇下自己成績同目標嚟報。總而言之，sem 3 cGPA 愈高愈好。
理工大學
如果目標係中文及雙語學系，咁就將 GPA 有咁高拉咁高，因為只要你嘅 GPA 係佢 cut-off 位上面就有機會直接取錄，無需面試。
城市大學
主要都係 GPA 分高下，起碼 3.3。如果文憑試英文成績唔係太高嘅話建議考 IELTS，因為貌似城大好睇重 IELTS（≥7），而且 GPA 夠高嘅話會直接取錄。翻譯同英語研究無面試環節，所以必報。英語研究要有 ILETS ≥7；翻譯就唔使。無必要就唔好考，我都無考，考一次盛惠二千（考得好 CC 有津貼）。
浸會大學
浸大嘅收分話高唔高，面試表現佔重較大。我哋之前個屆得一個師姐入到，佢最後 cGPA 3.15（有條件取錄係 3.2），完全係符碌入咗去，都算係勵志故事。不過今年我哋翻譯都起碼有四個收到浸大取錄，貌似 cGPA 都有 3.3 以上，所以有興趣嘅不妨一試。
註：浸大文科其實唔差，不過你 year 3 入嘅話，你要讀 77 個學分，其他大學通常要讀 63-66 個學分。讀兩年即係四個學期，每個學期平均讀 6.41 科……要自己諗下有無能力讀同應付。我就唔會揀浸大，因為要讀普通話、體育、77 個學分同埋好多翻譯無關嘅嘢。
教育大學
教大普遍被人當水泡，GPA 要求貌似唔高，不過詳細唔太清楚就唔多講啦。
中文大學／香港大學
真係要有返咁上下料到先好報，詳情就去下次 graduate
sharing 等啲學神學霸自己講啦。
問答環節
報幾多間先穩陣？
大部份人報三間，都係按返自己興趣同目標決定。
個人陳述要寫啲咩？
內容主要寫你嘅強項、該大學課程嘅特色、同埋表示你好想入讀嗰間學校嘅課程。大約寫兩頁紙，有需要可以揾熟悉嘅講師幫手睇或問下意見。建議去聽下 CC 搞嘅講座，會有好多關於個人陳述同面試嘅貼士。
一定要有推薦信？
唔係話一定要有，但人人都起碼有一封個陣自然有一封傍身會好啲……你哋明㗎啦。基本上有禮貌咁問，講師都會幫手寫。如果你想上到大學都讀翻譯嘅話，當然就揾翻譯科嘅講師寫啦。
面試前要準備乜？
要充分了解你報嘅大學課程！啲教授好憎啲人連個課程係讀乜、學校有咩特色都唔知嘅人去面試，所以起碼要上去相關學系嘅網頁，同埋睇熟啲課程內容，有時間最好去埋開放日、聽下間大學舉辦嘅收生講座，大學會派人去 CC 講。同埋要小組面試嘅話就要多留意時事啦。
面試一定要着西裝？
文科並唔一定要着西裝，其實着件白色恤衫、冷衫，加一條斯斯文文嘅裙都可以，不過普遍都係以着西裝為主。而有啲大學，例如教大，係比較喜歡學生着西裝面試，所以最好都係預備定一套西裝。唔一定要係黑色，可以揀下深藍色、灰色，會比較出眾。
面試要注意乜嘢？
個人面試放鬆啲，當傾計就得，記得有笑容。小組面試我個人就比較唔擅長……不過嚟嚟去去都係笑容、唔籠斷發言、多眼神交流、前後發言唔矛盾等。有需要就揾導師模擬面試 。
面試通知方法？
派面試嘅通知方法主要兩種：電郵同電話。例如理大就係先打電話再電郵通知 ; 而城大同浸大就淨係電郵同短信通知。所以報名之後咩電話都要聽，無聽到都打返去。請參閱腳註。
留位費幾銀？
每間大學留位費不一，多數一萬。最好預留二萬左右以防萬一。
收到大學取錄通知就要即刻交錢？
幾乎所有大學都要求兩星期內交留位費，否則視為棄權。但唔好咁早交錢，因為啲留位費係無乜可能退畀你。可能交完錢之後，另一間更好嘅大學就咁啱得咁橋畀 offer 你，到時轉肽嘅話就會無咗一皮野，所以收到 offer 就等多陣。不過等到最尾個幾日，都無另一間大學通知，就要決定畀唔畀錢，搏唔搏之後有更好嘅 offer。可能你放棄呢個 offer，之後又無其他 offer，就會奶嘢無書讀。
建議時間表
七月：準備相關個人文件、成績表、獎狀、課外活動資料等；
八月：寫好個人陳述、搵人校對同潤稿（CC 有提供此服務）；
九月：搵導師寫推薦信；
十月：申請帳號、上載所有文件；
十一月：遞交申請；
十二月：準備面試、收集面試問題及了解大學課程；
一月：上載最新成績單；
二至六月：面試、筆試、等運到。
各大學申請同截止時間不一，請去大學官方網站了解。
腳註
